Jayda Hansen vs Simo Sedraty — Instagram Profile Comparison

⁨ ⁨ الله يرحمك أستاذ 🤍 شوقي صاحبي وجمعتنا في الحقيقة الخدمة أكثر من الصحبة في الأول ومن بعد تعرفت عليه أكثر، واحد الإنسان اللي ما يخسر الخاطر لحتى واحد كيعطي من قلبه، كيضحي بوقته وبجهده باش ما يقولش لا. دائما كنت كانختلف معاه حيث ما كيعرفش يقول لا، كيعرف يدير الخاطر لكلشي، شوقي و هو مريض كان كيقري فورماسيو في صناعة الفيديو! كنت شفته مريض و قلت ليه خاسك تحبس ترتاح، جاوبني ببرودة و قالي: داك الوليدات مآمنين بهدشي اللي كنقريهم، غي نكمل معاهم و غنمشي نرتاح. شوقي إنسان طيب بزاف، كنعرفه هذه مدة طويلة وكانخدم معاه وراء الكواليس وما غنقولش عليه غير كان فنان ولكن إنسان قاري إنسان عارف، إنسان واعي و إنسان مربي، مخلق، شوقي كانت فيه واحد الخصلة زوينة اللي هي أنه عايش مع الأم دياله بوحدهم وديما فاش كنا نخدموا للعروض المسرحية اللي كنا نديروا أو الفيديوهات اللي كانصورهم مع بعضنا أو السيناريوهات النصوص اللي كانكتبو! كان ديما مكيبغيش يبات في الدار البيضاء وديما خصو يرجع القنيطرة باش يبات مع الأم دياله لانها كبيرة في السن و بوحدها. كان ما يخطاهاش. كنا عارفين الحالة دياله صعيبة ولكن ما كناش كنتسناوه يفارقنا هكا، كنا دائما كنسول فيه وكان دائما يقول لنا أنا بخير. آخر مرة هضرت معاه هذه تقريبا سيمانة، كتب لي ميساج عادي، قالي: انا بخير وعلى خير والحالة دياله كتحسن و ارتحينا شوية عليه ولكن ربي بغاه وإن لله وإن إليه راجعون هذا البوست بغيت نكتبوه و يبقى هنا لواحد الإنسان اللي كان صاحبي جمعاتنا الخدمة و الفن و الضحك اللي كنبغيو، الموت دياله صدماتني ولكن أنا من خلال المعرفة ديالي معاه عارفه إنسان شجاع إنسان واجه المرض دياله وواجه الموت دياله، إنسان ما غاديش نساه، ربما نتوما عرفتوه غير بالفيديوهات اللي كيدير التعليمية والفيديوهات الكوميدية اللي كيدير أو عرفتوه في مسلسلات! ربما عرفتوه في الفيديوهات اللي درنا مع بعض. أنا بغيت نقول لكم هذا الإنسان ترحموا عليه من القلب لأنه أقسم بالله يستحق ترحموا عليه ودعيو معاه من القلب و مع الأم دياله بالصبر. من أطيب خلق الله، الله يرحمك أستاذ⁩⁩ تفكروه 🤍